None
QISSALARDAN HISSALAR
(O‘zbekiston xalq yozuvchisi Tohir Malik
ijodiga oid kuzatishlar misolida)
O‘zbek bolalar qissachiligining so‘nggi yillardagi
rivojini Xudoyberdi To‘xtaboyev, Tohir Malik, Hojiakbar
Shayxov, Anvar Obidjon kabi zabardast nosirlar ijodining
nurli sahifalarisiz tasavvur etish mushkul. Xudoyberdi
To‘xtaboyev, Anvar Obidjon, Hojiakbar Shayxovlarning
sarguzasht qissalari qahramonlari – Akromjon, Hoshimjon,
Meshpolvon, Avtobolalar allaqachon o‘zbek kitobxoni uchun
Mark Tvenning Tom Soyeri, Karlo Kollodining
Pinokkinosi, Janni Rodarining Chipollinosi, Aleksey
Tolstoyning Buratinosi kabi qadrli va unutilmas
siymolarga aylanib ulgurgan. O‘z asarlarida g‘aroyib
sarguzashtlardan ko‘ra real voqelik tasviriga, jiddiy
mushohadaga keng o‘rin ajratgan Tohir Malik qissalarida
garchi yuqorida qayd qilingan obrazlar xususiyatlarini
takrorlovchi qahramonlar mavjud bo‘lmasa-da, bu asarlar
mutolaasi katta-kichikni o‘yga toldirgani, qizg‘in bahsmunozaraga undagani rost.
